KRALENDIJK – Bonaire International Airport N.V. (BIA), kompania ku ta manehá Aeropuerto Flamingo, ta fortifiká e organisashon pa realisá e plannan di desaroyo ambisioso di aeropuerto. 

Bou di direkshon di direktor Maarten van der Scheer, un tim chikitu i dediká ta traha diariamente pa sigui modernisá e aeropuerto mas. Ku kresementu kontinuo di tantu poblashon di e isla, komo e kantidat di bishitantenan, BIA a desaroyá plannan amplio pa entre otro renová i ekspandé plataformanan, terminal i fasilidatnan komersial. E promé resultadonan di esakinan ya ta visibel kaba. Pa sigui ku e desaroyonan akí ta rekerí trabounan preparatorio sólido e añanan benidero, siguí pa destahonan i ehekushon di proyektonan.

Pa realisá e agènda yen di plan akí, segun BIA ta bisa, ta nesesario pa fortifiká diferente parti di e organisashon. Komo promé paso gerensia, Hunta di Komisario (RvC) i akshonista, Entidat Públiko Boneiru (EPB), a disidí ku lo bai traha ku un gerensia di dos persona. A haña Marco van de Kreeke, e aktual presidente di e Hunta di Komisario, dispuesto pa drenta gerensha di BIA komo direktor interino. E temporada benidero lo sigui traha konhuntamente pa duna e direktiva un kontenido struktural i fortifiká e organisashon kompleto. Den esaki ta duna hopi balor na brinda oportunidat na talentonan lokal i personanan ku tin potensialnan haltu den e organisashon lo haña espasio pa sigui desaroyá nan mes.

Van de Kreeke ta un profeshonal di aviashon ku eksperensia i tabata direktor kaba di BIA di 2005 te 2008. Ku su eksperensia i konosementu amplio di e retonan ku ta spera aeropuerto, e por kontribuí mesora pa sigui desaroyá e plannan i e organisashon.

“BIA ta desaroyando su mes bon, pero tin tambe reto grandi su dilanti. Nos tin mester di poder di ehekushon i p’esei nos ta fortafiká e organisashon kompleto e temporada benidero” segun direktor Maarten van der Scheer. “Mi ta hopi kontentu ku nos a logra haña Marco dispuesto pa bin reforsá e tim. Di e forma akí nos por aselerá mehorashon i ekspanshon di Aeropuerto Flamingo mas.”

Marco van de Kreeke ta añadí: “Desde mi promé periodo komo direktor na BIA hopi kos a kambia, tantu riba e isla komo na aeropuerto. De e añanan ku a transkurí mi por a duna un kontribushon komo komisario na desaroyo di Aeropuerto Flamingo. Mi ta orguyoso di e organisashon fuerte i finansieramente salú ku ta eksistí na e momentunan akí. Na mes momentu e desafionan ta keda grandi. Mi ta ansioso pa por hunga un papel aktivo den mas kresementu i desaroyo di aeropuerto, huntu ku Maarten, RvC, EPB i tur partner.”

Seis luna

Marco van de Kreeke lo bai apoyá BIA durante por lo ménos seis luna i lo traha den e priodo akí tantu na Boneiru komo for Hulanda. Van de Kreeke lo baha komo komisario; Hunta di Komisario i akshonista EPB, riba término kòrtiku, lo buska un remplasante adekuado. Tanten visepresidente Angel Bermudez lo okupá presidensia di e Hunta di Komisario.