Kralendijk- Fundashon Mariadal, den koperashon ku Delfin’s Resort a kuminsá ku un hotèl di kuido. Awe e promé wéspetnan di kuido ta okupá e promé dos kambernan.

Den e hotèl di kuido ta akomodá pashènt – Delfins ta preferá papia di wéspet di kuido – ku no nesesariamente mester keda hospitalisá. E hotèl di kuido enfátikamente no ta enfoká riba pashènt di Covid. Aktualmente e krísis di Covid ta pone hopi preshon riba hòspital di manera ku tin ora mester posponé tratamentu ku no ta di emergensia. E hotèl di kuido ta aliviá un parti di e preshon ei. Aparte di pashènt di Boneiru, esei por ta pashènt di Saba i Sint Eustatius tambe ku tin mester di kuido di salú inmediato. Dòkternan di Fundashon Mariadal ta wak kua ta e pashèntnan i/òf habitantenan di Kas di Kuido ku por haña akomodashon den e hotèl di kuido. Personal di kuido normal di Mariadal ta kuida tambe e wéspetnan di kuido den e hotèl di kuido.

Ekipá

E studionan ku Delfins ta pone disponibel ta keda na e piso abou i ta ekipá ku tur fasilidat, manera frishidèr, microwave, televishon, wifi, èrko i telefon. Pa e adaptashon nesesario pa bira un kamber di kuido den hotèl por ekipá e studionan ku aparatura di oksígeno i otro aparatura médiko. E wéspetnan di kuido ta disponé di un boton pa yama enfermera(o). Banda di esakinan hòspital ta hasi uso di algun studio pa fasilidatnan di sosten. Por amplia e kantidat di studio pa wéspet di kuido te maksimalmente 12 kamber di hotèl.

Turismo médiko

Mariadal i Delfins pa algun tempu kaba tin kontakto ku otro tokante un hotèl di kuido. Ámbos partido ta interesá den turismo médiko. Hende ku limitashon tambe tin gana di por bai ku vakansi. Por ehèmpel pashènt di diálisis, hende ku un limitashon físiko òf hende ku ta hasi uso di ròlstul. Ora ku e krísis di Covid ta tras di lomba, nos ta evaluá kon nos por hasi esaki posibel, segun Delfins i Mariadal.