Mariadal ta hasi yamada pa ta kouteloso ku síntoma di Covid

KRALENDIJK- Fundashon Mariadal ta hasi un apelashon riba bishitantenan pa no bin hòspital i e poliklínikanan si nan tin síntoma di COVID-19.

“Si bo tin keho ku por mustra riba kontagio ku COVID-19, no bin hòspital òf poli e ora ei. Keda kas, aunke bo tin un sita. Tuma kontakto via telefòn +5997158900 i traha un sita nobo òf konsultá si den bo kaso tin otro solushon. Tuma kontakto tambe ku Entidat Públiko Boneiru na number di telefòn 0800 0800 pa traha un sita pa hasi tèst” asina Fundashon Mariadal a skibi den un komunikado di prensa.

Akompañante

Tambe Mariadal ta hasi un súplika pa ora di bin poliklínika, preferibelmente bin sin akompañante òf ku solamente un akompañante. Tambe ta pidi pa den hòspital tene semper un distansia di 1,5 meter for di otronan. “Asina bo no ta protehá bo so, pero nos empleadonan den kuido tambe”, asina ta konsehá.

Prevenshon

Banda di esei den hòspital mester kumpli estriktamente ku e reglanan di prevenshon. Pa dia tin dos momentu di bishita, esta di 11:30 or te 13:00 or i di 18:30 or te 20:00 or. Pa kada pashènt ta pèrmití solamente un (1) bishitante pa dia. Esaki ta konta tambe pa bishita pa kamber di parto i Kas di Kuido. Bishitantenan, klientenan i pashèntnan mester tene kuenta ku uso di un tapaboka médiko ta obligatorio den hòspital i den botika. No ta pèrmití tapaboka di paña. Na entrada di hòspital ta skrin bishitantenan.

Mariadal ta bisa di ta konta ku komprenshon i koperashon di tur hende.