BOGOTA – Marina Kolombiano a interseptá e narko-supmarino di mas grandi te ku awor den Oséano Pasífiko. Na bordo di e barku ku ta trinta meter largu a haña un lote di tres mil kilo di kokaina, ku un balor riba merkado kalkulá na shen mion euro.

E barku èkstraordinario, ku ta nabegá net bou di superfisie di awa, tabata rumbo pa un sitio deskonosí den Amérika Sentral. Segun fuentenan e barku lo tabata forma parti di un trafikashon di droga direkshon pa Estados Unido. A detené e tres personanan na bordo ku ta tres Kolombiano di 45, 54 i 63 aña bieu. Nan ta pretendé ku un kartel di droga a fòrsa nan pa hasi e biahe aki.

A lastra e barku pa Buenaventura kaminda a konfiská e droga. Desde 1993 marina Kolombiano a logra interseptá 228 tipo di e supmarinonan  asina. Ta uza e supmarinonan tambe pa transporte pa Europa via Oséano Atlántiko, lokual ta un esfuerso ku riesgo. 

Dos luna pasá a deskubrí un supmarino ku 2600 kilo di droga na bordo i dos kurpa sin bida. E víktimanan a muri pa motibu di huma di motor, mientras ku e otro dos personanan na bordo apénas a sobrebibí i a detené nan.