Mas atenshon pa Alzheimer na Boneiru 

KRALENDIJK – Debí na e enbehesimentu kresiente di nos komunidat e kantidat di hende ku demensia lo oumentá sigur durante e dékadanan binidero. Demensia ta un kondishon serebral kaminda un persona entre otro pa motibu di pèrdèmentu di memoria, pokopoko pero sigur ta bira kompletamente dependiente di kuido di otronan. E Organisashon Mundial di Salú (WHO) a proklamá 21 di sèptèmber komo Dia Mundial di Alzheimer. Pa medio di e dia akí ta dediká atenshon na e kondishon akí. Tema di e aña akí ta ‘Konosé demensia, konosé e malesa di Alzheimer’. 

Na aña 2019 riba enkargo di Entidat Públiko Boneiru a formulá un plan nashonal di maneho di demensia Boneiru. Den e plan akí a establesé diferente punto pa hasi di Boneiru un komunidat ku aktivamente ta hasi esfuerso pa laga hende ku demensia partisipá mas tantu posibel den bida diario.

Fundashon Alzheimer Bonaire (FAB) ta e organisashon ku na Boneiru entre otro ta dediká su mes na engrandesé konsiensia tokante demensia. FAB ta prinsipalmente aktivo pa hende ku demensia i e personanan mas yegá na nan. Durante luna di sèptèmber nan ta organisá diferente aktividat manera anochi di informashon i tayer pa profeshonal. Tambe nan a traha un foyeto pa miembronan di famia i/òf e personanan mas yegá na hendenan serka kende a diagnostiká demensia. E foyeto akí ta kontené informashon tokante kiko ta demensia, kiko por ferwagt relashoná ku esaki i kon por anda ku e malesa akí.

Pa para ketu na Dia Mundial di Alzheimer dia 21 di sèptèmber FAB ta presentá e pelíkula ‘WEI’ den sala di konferensia Piet Mondriaan na Courtyard Marriott Resort. Wei ta un pelíkula di Ruud Lenssen, den kua e ta registrá e trayekto di demensia i kuido boluntario (mantelzorg) di su mayornan.

Tur aña un representante di direktiva ta entregá e relato anual na e diputado di kuido di salú. E aña akí banda di e relato anual a entregá e foyeto i poster tambe na diputado Den Heyer.

Pa mas informashon tokante demensia bo por wak riba https://www.alzheimer-bonaire.com/. Riba e wèpsait akí tin e foyeto i e poster tambe.