Mas detenshon relashoná ku banda No Limit Soliers (NLS)

Willemstad- Djabièrne dia 19 di mart riba petishon di Ministerio Públiko di Kòrsou a detené e sospechoso C.S.H. di 50 aña na London.

Ministerio Públiko Kòrsou a pidi Reino Uní pa detené C.S.H. por medio di un petishon di asistensia hurídiko den e investigashon grandi yamá Themis. Detenshon di C.S.H. ta e di 8 den un korto tempu. Anteriormente den e investigashon aki tabata tin detenshon na Kòrsou na luna di novèmber2020, febrüari i mart 2021. E detenshon di mas resien a tuma lugá djasabra 13 di mart kaminda a detené S.A.P. di 36 aña ku a biaha via di Repúblika Dominikana pa Kòrsou.

Ta sospechá ku C.S.H. ta forma parti di e organisashon yamá No Limit Soldiers (NLS). Ministerio Públiko ta sospechá ku NLS ta un kolaborashon kriminal i ta tene e organisashon responsabel pa diferente asesinato kometé den Reino Hulandes i pafó di esaki. Tambe ta sospechá ku e organisashon tin hopi aña ta dediká nan mes na narkotráfiko internashonal.

Kolaborashon

Segun Ministerio Públiko, ta danki na e kolaborashon internashonal ku Reino Uní ku por a aresta C.S.H., un miembro prominente di e organisashon. Ta sospechá ku C.S.H. tabata kordinadó di asesinato i tabata direktamente inbolukrá den dunamentu di òrdu di diferente delitu di violensia entre otro na St. Maarten.

Un tim spesial di Metropolitan Police a detené C.S.H. den su bibienda na London. Riba petishon di Ministerio Públiko tambe tabatin entrada hudisial na e bibienda i den su negoshi na London. Ministerio Públiko a hasi un petishon di ekstradishon di C.S.H.

---

Lesa tambe:

• 
  Auto ta aksidentá i ta keda pegá bou di treiler
• 
  Arthur Sealy: Daisy Coffie tabatin tur derechi pa kuestioná kondukta di diputado Hennyson Thielman 
• 
  Sint Eustatius ta selebrá e di 104 aña di habitante mas bieu
• 
  Komparashon di preis ta mustra: Caribe Nobo supermerkado mas barata na Boneiru
• 
  Tim di futbòl feminine ta na kaminda pa kompetensia na Belize