WILLEMSTAD – Ministerio di Finansas a pone 235.000 embargo di impuesto un banda pa motibu ku nan a kadká. No ta bai kobra e kasi 475 mion florin di e embargonan aki. Esei minister di Finansas Javier Silvania a informá.

Formalmente e pagadó di impuesto  mes mester entregá un apelashon riba e impuesto ku a kaduká, pero a disidí  pa aktua proaktivo i no rekuperá e embargonan ku a kaduká. Esei ta duna Servisio di Impuesto mas espasio i kapasidat pa prosesá e aktual embargonan.

“Ku esaki ta promové e trato igual di pagadónan di impuesto”, minister Sylvania ta bisa. “No ta tur hende ta konosí ku e konsepto ‘verjaring’ i no tur hende por pèrmití su mes pa buska un asesor fiskal pa entregá un beroep op apelashon”.

Un embargo a pasa tempu na momentu ku durante sinku aña no tuma ningun akshon pa kobra. Si dentro di e sinku añanan ei a manda un karta pa e pagadó di impuesto, e ora ei un tèrmino nobo di sinku aña ta kuminsá konta.

Aktualmente ta trahando den konsulta ku ministerio di Finansas un sèt di kriteria adishonal pa limpia e archivo di kobransa. Aki ta trata embargonan bieu ku un chèns abou pa kobra nan.

Servisio di Impuesto ke traha mas den aktualidat. E chèns pa kobra embargonan ta mengua rápido despues ku a imponé nan. P’esei mester fiha e kapasidat di kobransa na promé lugá pa kobra debenan resien. 

Ku esaki ta prevení tambe ku debenan ta sigui akumulá añanan largu, lokual ta krea problema  pa paga e debe akumulá. “Si prevení debenan di impuesto i tene e obligashonnan fiskal koriente al dia, e pagadó di impuesto al final ta mihó sirbí”, segun minister Sylvania.