Maskarada ta bishitá gezaghèber Edison Rijna

KRALENDIJK- Roba promé dia di 2023, un grupo grandi di maskarada a bishita kas di gezaghèber Edison Rijna. 

E grupo a presentá na kas di e promé mandatario i huntu ku hendenan presente, tabatin un dushi ambiente. Na e okashon gezaghèber a dirigí algun palabra. “Tur aña maskarada ta bishitá mi kas i tanten mi tei, ta kontinuá ku e aktividat tur aña di nobo. Ta importante pa mantené kultura i identidat di nos isla. Nos ta tuma 1 minüt di silensio, pa rekordá riba esnan ku no tei mas. Ta bon pa kòrda un momentu riba nan. Mi no a lubidá, mi ta tende boso gruña algu ei. Mi tin e bòter tradishonal manera tur aña ta e kaso. Pero, boso komo miembro di e grupo di maskarada, mester presentá promé ku mi hasi entrega di e bòter na boso.” 

E fiesta a sigui ku kantamentu i baliamentu. Por a tuma nota di Daisy Coffie i diputado Elvis Tjin Asjoe presente na e sitio. E diputado tabata toka kuarta, huntu ku e grupo di Maskarada.