WILLEMSTAD- Mr. Mauritz de Kort entrante promé di yanüari 2022 ku probabilidat lo bira e Presidente nobo di Korte Komun.

E mesun fecha, e periodo di mr. Eunice Saleh ta terminá. Saleh a indiká algun tempu atras, ku e lo no ke wòrdu nombrá pa un periodo nobo. Den lunanan tras di lomba, pesei a ehekutá un proseso di reklutamentu pa un Presidente nobo.

Riba dia 23 di sèptèmber 2021, den un reunion di Hòf a disidí pa proponé De Kort komo e Presidente nobo. Aktualmente De Kort ta fungiendo kaba komo Presidente Suplente.

Karta

Diriktiva di Korte Komun mientrastantu a manda karta pa Ministernan di Hustisia di Kòrsou, Aruba, St. Maarten i Hulanda pa proponé nombramentu di De Kort.

Formalmente tin ku ratifiká e proposishon ainda pa Gobièrnu di Reino. No ta konosí ainda, ki dia Gobièrno di Reino lo reuní tokante esaki.