WILLEMSTAD – MCB Group i e método di pago online Sentoo ta bai uni den partnership pa asina sigui ekspandé e posibilidatnan pa pagonan online. 

á Esaki ta nifiká ku pronto tur MCB su klientenan komersial i personal den Karibe Hulandes por kuminsá hasi uzo di Sentoo pa hasi i risibí pago direktamente via nan propio kuentanan bankario.

Sentoo, un método di pago online lokal ta brinda klientenan di MCB e opshon pa checkout i hasi pago ku Sentoo. Manera Michael de Sola, Direktor General di MCB ta indiká: “E método di pago online Sentoo ta parti di nos banko su strategia pa sigui brinda solushonnan di pago inovativo huntu ku partnernan lokal i e ta aliñá ku nos banko su plannan pa mehorá e kliente su eksperensia dor di optimalisá nos solushonnan bankario digital. Den un mundu kaminda nos klientenan ta ferwagt mas i mas di por paga unda ku ta i ki ora ku ta, Sentoo ta brinda un manera kumbiniente, instantáneo i sigur pa hasi i risibí pago pa medio di pago lokal online. P’esei nos ta kontentu di asosiá ku Sentoo i ofresé e servisio akí pronto nan nos klientenan.”

Ku Sentoo, tantu MCB su klientenan komersial komo esnan personal lo benefisiá di e servisio di pago nobo akí. Komersiantenan lo por risibí pago online via negoshinan online, appnan móbil i sistemanan di fakturashon ku Sentoo su opshonnan di pago, manera un kònòpi di checkout, kódigo QR i lenk di pago. Mas aleu, negoshinan sin aktividatnan di e-commerce, tambe por ofresé Sentoo pa kualke tipo di pago online.

Sentoo lo ta e úniko método di pago ku pronto lo keda integrá direktamente ku MCB su ambiente bankario online. “Na Sentoo, semper nos ta buscando maneranan pa ekspandé nos servisionan i alkansá mas empresa ku ke brinda nan klientenan opshonnan di pago lokal. Nos ta entusiasmá pa introdusí Sentoo na MCB, dunando tur hende akseso na un manera mas simpel i lihé di pago online ku nan propio kuentanan bankario”, di akuerdo ku Vincent van Rutten, Sentoo su Direktor General.

“Sentoo ta grátis pa uzo di konsumidó i no ta rekerí registrashon (sign-up). Ora di paga, klientenan ta skohe e método di pago di Sentoo, siguí pa MCB. Djei nan ta keda dirigí na MCB online banking pa outentiká i aprobá e pago. Ta mustra tur informashon di pago nesesario i no por kambia esakinan, garantisando un transakshon ku lo kana suave i outomatisá for di e kliente su kuenta bankario pa kuenta bankario di e komersiante.”

E enfoke di MCB Group ta pa ofresé e método di pago online Sentoo na tur kliente komersial i personal promé ku medio 2023, via su ret na Kòrsou, su filialnan na Aruba (Caribbean Mercantile Bank N.V.), St. Maarten, (The Windward Islands Bank Ltd.), i islanan BES – Boneiru, St. Eustatius i Saba.