Un di e avionnan ambulans di Ambulancias Aéreas de Colombia. Pòtret: Colcharters. 

KRALENDIJK- Medicair, situá na Boneiru i un parti di operashon EZ Air ku ta fasilitá biahenan médiko, a ekspandé su servisio mediante un kolaborashon ku Ambulancias Aéreas de Colombia. 

E koperashon aki lo duna Medicair e posibilidat pa ehekutá biahenan di ambulans den e área karibense más amplio, uzando avionnan di ambos kompania, i usando personál médiko di Ambulancias Aéreas de Colombia. 

Ambulancias Aéreas den transkurso di e último 17 aña a krese bira grandi ofresiendo transport médiko na pasheñonan den áreanan remoto òf ku servisio limitá. 

René Winkel, Direktor di Medicair, ta mustra entusiasmo ku e akuerdo, enfatisando e oportunidat pa ofresé servisionan den un área geográfiko mas amplio.

Servisio nobo

Tambe e dos kompanianan ta bai traha huntu pa ofresé diferente servicio nobo pa nos islanan, manera guia médiko pa pasahero ku por biaha riba avionnan komersial, pero ku pa na situashon di salú mester di un hende kapasitá pa biaha huntu ku nan. 

Ambulancias Aéreas de Colombia ta un kompania bastante grandi ku 190 empleadonan i un flota relativamente grandi di diferente tipo di avion. Tambe nan tin un tim médiko basta grandi ku por duna kuida adekuá na persona den un estado di salú delikado. Diferente di e avionnan tin un unidat di kuido intensivo kompleto na bordo pa trata pashènt ku mester di esaki.