KRALENDIJK – Mènedjer di programa di e Akuerdo Intergubernamental Boneiru, Danny Rojer, den bon deliberashon ku Entidat Públiko Boneiru i Gobièrnu di Reino, a traspasá su tareanan pa ámbos organisashon entrante promé di òktober. 

E funshon di mènedjer di programa di e Akuerdo Intergubernamental a drenta na vigor na momentu ku Kolegio Ehekutivo di Boneiru i Sekretario di Estado di BZK a firma e Akuerdo Intergubernamental Boneiru. E mènedjer di programa, ku a inisiá na mart 2019, tabata responsabel pa kordinashon di ehekushon di e Akuerdo Intergubernamental, pa reportá tokante e progreso i un bon kolaborashon entre tur partido konserní.

Kolegio Ehekutivo Boneiru i Ministerio di BZK ta konkluí ku den e fase aki e lo pone e monitoreo i kordinashon di e ehekushon di e Akuerdo Intergubernamental serka e partidonan ku a firma e akuerdo i ku ta responsabel pa ehekushon. Ademas Kolegio Ehekutivo i Gobièrnu di Reino ta hasi uzo di e momentu aki pa evaluá e periodo tras di lomba konhuntamente i pa wak pa dilanti pa e sobra periodo di balides di e Akuerdo Intergubernamental  i e prioridatnan pa e periodo aki.

Strutura nobo

Segun un komonikado di prensa ku partidona a saka awe, ta bisa ku e situashon aktual na Boneiru ta pidi pa un struktura di kolaborashon nobo rondó di e Akuerdo Intergubernamental. “Kolegio Ehekutivo i Reino ta traha huntu pa logra e metanan manera stipulá den e akuerdo. Kaminda ku den komienso ainda mester a buska un manera di kolaborá i monitoriá, entretantu a originá un manera di traha den kua e tarea -i responsabilidatnan aki ta sigurá. Asina a yena e funshon di Sekretario di gobièrnu lokal  for di promé di mart di e aña aki i a reforsá e ofisina di e Sekretario”, asina e komunikado ta bisa.

Krítika

Mester bisa ku kasi for di komienso tabata tin hopi krítika riba funshonametu di Rojer. A pesar di hopi speransa na komienso, hopi hende tabata mira i bisa ku realmente masha poko a kambia ku entrada ku Rojer. Sekretario di estado aña pasá a bisa ku e no Tabata tin problema ku e hecho ku pa hope hence Rojer Tabata invisible, basta ku e resultadonan sí tabata tei, nèt algu ku pa hope hence tabata e loke ku a falta.