KRALENDIJK- Djamars atardi durante un konferensia di prensa Entidat Públiko a duna splikashon di su plannan pa ku e kamindanan na Boneiru.    

Presidente di e stuurgroep Mobilidat, gezaghèber Edison Rijna, a bisa ku ta trata di un tema hopi importante pa e isla di Boneiru. “E isla ta den desaroyo i esaki ta nesesario spesialmente e parti di seguridat den tráfiko ku ta mi responsabilidat.”

Marlon Roy Martina, kende ta direktor direktorado planifikashon i desaroyo (R&O) a splika ku ta bai informá di loke ta bai sosodé, pa evitá mal komprondementu. ‘Den e Bestuursakkoord, a palabra ku mester atendé ku e kayanan. Nos a atendé resientemente esnan mas importante. Awor nos por bai traha riba situashonnan pa futuro. Tin diskushon lantando, unda ta bai i kon ta bai hasié i mas. Tin kayanan ku mainta ta fila di vehíkulo,  mèrdia i atardi tambe ta drùk. Nos a sondia pa wak kua ta e kayanan mas okupá. Nos a pensa kon traha kayanan, pa pasa na banda di kaminda ku ta drùk i sigui kore. Sigur ta pensa kon pa e outomobilistanan ta sigur den tráfiko. P’esei nos ta bai hasi investigashon di midimentu. Ta bai traha un master plan di tráfiko di 2023 pa 2030. Awendia tin midimentu ku radar i ta tumando konseho pa un bon eskoho pa Boneiru.” 

Proseso

Joselito Statia komo ‘Projectleider Wegenprogramma’, a duna un splikashon di e proseso kon ta bai midi tráfiko ku ta pasa riba sierto kaya i e momentu. “Kantidat di outo ta oumentando, i awor mas negoshi, esei ta nifiká mas sirkulo den tráfiko i mas hende ta biba riba e isla.” 

Pa medio di pantaya el a mustra e forma di midimentu i a papia di e equipo ku ta bai usa pa midi. Joselito: ”Esaki ta un aparato sofistiká ku ta midi kiko ta pasa riba e kaminda, esta si ta outo, bròmer, baiskel, trùk entre otro. 

Pa hasi e midimentu ta bai pone kámara pa midi na 23 diferente sitio. Sierto krusada ku tin hopi aksidente tambe ta bai pone kámara pa konstatá e orígen di problemanan. Tin plan pa bai traha sitio pa stashoná vehíkulo kaminda tabata prizon i renobá e área dilanti Stadion di Playa tambe pa uso pa stashoná outo. Ta krea posibilidatnan pa hende kana den sombra, for di e sitio di stashoná outo bai direkshon di sentro di siudat.“ 

Despues di e midimentu ta tuma desishonnan, kisas tambe ta un alternativa bus públiko, transportá hende di un sitio pa otro den e área di sentro di siudat. Ta bai krea kisas bus ta kore i hopi hende no mester kore nan outo.