AMSTERDAM – Awe lo mester a sigui den korte di hustisia na Amsterdam e kaso penal kontra Delano Geerman (22) i Kamil Egiert (36), e supuesto asesinonan di Peter R. de Vries. Pero ku tur probalidat mester trata e kaso di nobo

Awe mainta durante e seshon den e kaso ku a habri bèk a bini dilanti ku esei tin di haber ku baimentu di un di e wesnan. Un di e tres wesnan a muda pa eksterior. El a plania su baimentu pa e verano aki, pasobra lo a finalisá e kaso-De Vries. 

Pero na luna di yüli a habri e kaso bèk inesperá. Ministerio Públiko a bini nèt promé ku e veredikto ku dos deklarashon di testigu nobo, i korte di hustisia a posponé e sentensia.

Mientrastantu a instalá un wes remplasante, pero tin un opstákulo di prosedura mas. Segun korte di hustisia lei ta preskribí ku den un kaso asina mester trata e kaso kompletamente di nobo, a ménos ku Ministerio Públiko i e defensa no ta haña esei nesesario. Partidonan ta den kòmbersashon ku otro tokante esaki.

Den luna di yüni último Ministerio Públiko a eksihí un kastigu di bida largu pa nan. A tira De Vries 6 di yüli di aña pasá den sentro di Amsterdam, djis despues di un presentashon den e programa di televishon RTL Boulevard. El a muri nuebe dia despues den hòspital.

E deklarashonnan nobo ku lo a presentá awe, ta hasí dor di un testigu protehá i anónimo ku tin e apodo 5089. E lo ta un amigu di Krystian M. ku nan a detené 4 di yüli. Segun Ministerio Públiko M. a dirigí e aktornan di e morto direktamente.

E mésun dia a detené dos sospechoso mas, na Spaña i na Kòrsou. E tres personanan aki ta den aresto preventivo. Un hòmber ku nan a detené na Helmond 26 di yüli mientrastantu ta liber, pero ta keda sospechoso ainda.

Durante  e siguiente seshon numa, na kuminsamentu di novèmber, ta disidí si mester hasi e kaso di nobo.