Notisia

Minister Dijkgraaf ta bishitá Kòrsou, Aruba i Boneiru

Robbert Dijkgraaf, minister van Onderwijs, Cultuur en Wetenschap. Beeld: ©RVD – Valerie Kuypers en Martijn Beekman

DEN HAAG – E minister Hulandes di Enseñansa, Kultura i Siensia, Robert Dijkgraaf, ta kuminsá djadumingu 15 di yanüari ku un bishita di trabou na Kòrsou, Aruba i Boneiru. E ta keda un siman. E bishita ta den kuadro di e Konsulta Ministerial di Kuater Pais di Enseñansa, Kultura i Siensia i konmemorashon di e pasado di sklabitut.

Dijkgraaf ta e minister ku ta kordiná e Aña konmemorativo di Pasado di Sklabitut, ku ta inisiá riba 1 di yüli di e aña aki.

Na Kòrsou Dijkgraaf ta partisipá huntu ku sekretario di estado Gunay Uslu di Kultura i Media na e Konsulta Ministerial anual di Kuater Pais di Enseñansa, Kultura i Siensia

E tópiko durante e konsulta ei ta e kolaborashon entre e paisnan den reino riba tereno di enseñansa i siensia.  E meta ta pa fortifiká  enseñansa Karibense i e konekshon ku enseñansa superior.

Na Aruba e minister tin un enkuentro ku Gobernador Alfonso Boekhoudt i e ta papia tokante enseñansa i pasado di sklabitut ku promé minister Evelyn Wever-Croes, minister Endy Croes di Enseñansa i Deporte i minister Xiomara Maduro di Finansas i Kultura.

Luego e ta bishitá Colegio San Nicolas, Instituto Pedagogico Arubano, IPA, i e skol Mon Plaisir. Na Colegio San Nicolas nan ta papia di e preparashon pa enseñansa superior. Ku IPA i e skol Mon Plaisir e tema lo ta e kolaborashon entre e instituto di formashon di maestro(a) i e skolnan (básiko). Na Universidat di Aruba e ta papia ku studiantenan riba diferente tema.

Na Boneiru e minister ta papia ku Parlamento i ta bishitá tambe skol Amplio Papa Cornes. Despues e ta bai MBO Bonaire, ku e temanan alohamentu di enseñansa i preparashon pa enseñansa superior.

E minister ta papia tambe ku miembronan di e grupo di trabou 1 di yüli, entre kua representantenan di Fundashon Históriko Kultural Boneriano, e organisashon Boneriano ku ta dediká su mes ku dokumentashon di historia di Boneiru. E ta bishitá i papia tambe ku algun studiante di e Instituto pa Idioma.

Pasado di sklabitut

E pasado di sklabitut ta hunga un papel importante durante e bishita. Na Kòrsou Dijkgraaf ta konsultá ku representantenan di e Plataforma historia di sklabitut i su legado i ta bishitá National Archaeological Anthropological Memory Management, NAAM.

E bishita na Bándabou tambe ta den kuadro di  pasado di sklabitut, espesialmente e luchadó pa libertat Tula, ku na 1795 a guia un rebelion kontra sklabitut riba e isla. Siguiendo e ehèmpel di gobièrnu di Kòrsou, Gobièrnu Hulandes ta bai rehabilitá Tula. Na Universidat di Kòrsou Dijkgraaf ta papia ku e studiantenan tokante konmemorashon di e pasado di sklabitut.

Despues e ta bishitá e Skol di hotèl nobo, un koperashon entre ROC Mondriaan, Curaçao Hospitality & Tourism Association, CHATA, i Curaçao Tourist Board, CTB.

Den e Skol di hotèl ta forma e studiantenan di mbo komo profesional den e sektor hospitalario i di turismo. Na Kòrsou Dijkgraaf ta bai tambe Caribbean Research and Management of Biodiversity, Carmabi. Esaki ta un instituto di investigashon marítimo ku ta manehá tres parke nashonal na Kòrsou.

Na kaminda pa inisio di e Aña di Konmemorashon di  Pasado di Sklabitut Dijkgraaf ta bishitá tambe den komienso di e aña aki  Sürnam, Saba, Sint Maarten i Sint Eustatius.

Deel dit artikel
Rocargo
Rocargo
Rocargo
Rocargo