Notisia di Hulanda

Minister Harbers di Infrastruktura i Maneho di Awa ta bishitá Boneiru 

DEN HAAG – Minister Mark Harbers di Infrastruktura i Maneho di Awa ta bishitá Boneiru di 14 te ku 16 di aprel. Motibu di e bishita di trabou ta e Konsulta di Kuater Pais tokante asuntunan marítimo i di aviashon ku Kòrsou, Aruba i Sint Maarten. Ademas minister Harbers lo papia ku gobernantenan di Boneiru i lo bishitá haf i Aeropuerto Internashonal di Boneiru. 

Riba djaluna minister Harbers ta bishitá haf di Boneiru pa papia tokante e deseo pa yega na un haf di kònteiner nobo. Esaki ta nesesario pa hasi futuro kresementu posibel i oumentá siguridat di tráfiko rònt di e aktual haf. 

Mas lat riba e dia e ta bishitá Aeropuerto Flamingo. Aki e ta hasi apertura ofishal di ‘Celebration Day’, e dia habrí di aeropuerto. Tambe e ta risibí un presentashon tokante e plan pa remplasá iluminashon di aterisahe i plataforma, i pa drecha aeropuerto kompletu.

E minister ta papia tambe ku Kolegio Ehekutivo di Boneiru, tokante entre otro futuro di haf i aeropuerto. Esakinan ta di gran importansia ekonómiko pa e isla. 

Djamars e Konsulta di Kuater Pais ku Kòrsou, Aruba i Sint Maarten ta sentral. Riba agènda tin tópikonan marítimo i di aviashon. Na 2023 e paisnan ya kaba a papia ku otro tokante esakinan. E meta ta pa rekonfirmá e palabrashonnan ku a hasi e tempu ei i pa diskutí kon por konkretisá nan. Di manera ku den futuro tur pais por kumpli atrobe ku e obligashonnan di tratadonan internashonal ku nan ta afiliá na dje.

Tambe lo diskutí e posibilidatnan pa yega na un maneho pa Reino kompletu tokante investigashon di aksidente, aksesibilidat di tur isla i un pilot ku buelo eléktriko den e parti Karibense di Reino. 

Deel dit artikel
Rocargo
Rocargo
Rocargo
Rocargo