Ministerio Públiko i polis ta mustra imágen di fugitivonan na Schiphol

AMSTERDAM – Polis i Ministerio Públiko ta mustra desde awe te ku 31 di yüli 2022 pòtrèt di ocho preso ku ta fugitivo riba pantayanan na Schiphol i dos otro aeropuerto.

Tin e sospecho ku e fugitivonan aki ta tene nan mes skondí den eksterior pa evitá di sinta nan kastigu. Ta pidi biaheronan pa tira un bista riba e personanan aki den eksterior i duna polis tep.

Biaheronan pa islanan den Karibe of otro destinashonnan por mira pòtrèt di kriminalnan ku tin ku sinta sentensia di kuater aña di kastigu te ku bida largu.

Tin biaha tin sospecho den kua pais e fugitivo ta. Sinembargo por sosodé ku polis no por entamá e proseso pa laga arestá un persona asina, pasobra por ehèmpel no ta eksistí un tratado di ekstradishon ku e pais konserní.

Por sosodé tambe ku e kriminalnan aki ta kambia di lugá den e lunanan di fakansi aki. Via di e atenshon èkstra aki polis ta spera di kolektá informashon nobo unda e fugitivonan por ta i ku ken nan tin kontakto.

E tim FASTNL di rishèrshi nashonal ta realisá e akshon. Nan ta buska huntu ku Ministerio Públiko fugitivonan ku mester sinta un mínimo di 300 dia di kastigu ainda of ku mester paga mas ku 10.000 euro di but. Tambe ta buska fugitivonan ku ta na disposishon di hustisia.

Na tur tin riba e lista di e tim ku ta hasi e investigashon masoménos seishen hende. Aña pasá e tim aki a arestá 151 preso na Hulanda mes i den eksterior. Resientemente e tim a detené un di e dos personanan ku ta na disposishon di hustisia ku a hui for di Pompekliniek na Nijmegen.