ORANJESTAD – Ministerio Públiko na Aruba ta konfirmá ku promé minister Evelyn Wever-Croes a hasi denunsia pa motibu di supuesto iregularidatnan na Kas di Aruba na Den Haag.

No ta konosí ki dia el a hasi esei. Ya pa basta tempu kaba kosnan no ta kana bon na Den Haag, kaminda minister plenipotensiario, Guillfried Besaril, a retirá na luna di yüni di aña pasá pa motibunan personal, segun e mes ta bisa.

For di e retiro diripiente den luna di yüni a keda spekulá riba e motibu di su retiru. Den media a vinkulá su baimentu ku un investigashon di Servisio Sentral di Kontabilidat di Aruba tokante iregularidatnan ku supsidio na Kas di Aruba. Empleadonan di Kas di Aruba tambe lo ta embolbí den esaki.

E motibu ku Ministerio Públiko ta konfirmá awor públikamente ku nan tin e denunsia den nan poder i ku nan ta bai averiguá ku si tin motibu pa persiguí penalmente, ta bini pa motibu di un karta di Arthur Dowers i Mike De Meza di AVP. Nan ta pensa ku MEP ta hungando un wega pa no involukrá sierto hende.

Pa motibu di e atenshon ku a surgi den media, Ministerio Públiko a disidí pa trese e reakshon na Dowers i De Meza afó den un komunikado di prensa.