Notisia

Miones pa infrastruktura kultural di e parti Karibense di Reino

DEN HAAG – E añanan benidero miones di euro èkstra ta bai pa bibliotekanan i e patrimonio kultural den e parti Karibense di Reino. Esei ta pará den e Karta di mas Aña pa Kultura kaminda sekretario di estado Gunay Uslu di Kultura i Media ta splika su puntonan di salida pa e maneho di kultura pa e próksimo añanan.

E sèn no ta bai pa bibliotekanan físiko na Boneiru, Sint Eustatius i Saba so, pero tambe pa  biblioteka onlain ku tur seis isla por hasi uso di dje.

Sekretario di estado Uslu: “Kultura ta e base i e semènt di nos komunidat. I un biblioteka ta é sitio kaminda mucha, hóben i adulto ta bini den kontakto ku kultura, ku storia, ku otro.”

“Tambe nos ta invertí den patrimonio kultural i archivonan. Pasobra esei ta e storianan di nos pasado komun i nos mester kuida esei bon. Spesialmente pasobra e historia ei tin biaha ta kargá i kompliká.”

Pa mehorá e ret di biblioteka tin e aña aki un mion disponibel , i na 2023 i 2024 tur aña dos mion.

Biblioteka onlain

Un biblioteka onlain ku ta amigabel pa kliente ta un parti lógiko i importante di un biblioteka. Durante e pandemia di corona biblioteka onlain a krese rápido i sekretario di estado Uslu ke sigui desaroyá esaki. Huntu ku Biblioteka Real i otro sosionan ta bai realisá esaki. Tin sinku mion euro disponibel pa esaki anualmente pa henter Reino  i na 2023 i 2024 un montante èkstra di ocho  mion pa e infrastruktura digital.

Deel dit artikel
Rocargo
Rocargo
Rocargo
Rocargo