Morto masivo di djindja na Kòrsou i Boneiru ta motibu di preokupashon i vigilansia

KRALENDIJK/WILLEMSTAD – E morto misterioso masivo den e simannan resien na Kòrsou i Boneiru ta motibu di preokupashon i vigilansia, segun e Dutch Caribbean Nature Alliance (DCNA). 

E evento ta rekordá na un insidente similar na Costa Rica na 2017. No solamente e morto di e piska riba su mes ta preokupante, pero tambe e konsekuensianan posibel pa otro bestia manera turtuganan bèrdè, ku ta kome e piskanan morto òf malu. E djindja ku ta presente den henter e área di karibe, ta konosí tambe pa su propiedatnan tóksiko, hasiendo su konsumo un riesgo signifikante pa otro bestianan marino.

E morto resien aki por tin konekshon ku un kresemento eksplosivo anterior di e populashon di djinda. Ounke ku investigadónan ainda no sa kua ta e kousa, nan ta mira algun similaridat ku morto masivo di e piskanan aki na Costa Rica na 2017. 

Despues di e evento ei, a kolketá piskanan morto pa tudia nan, pero no por a determiná un kousa konkreto. Sinembargo, e situashon aki a subrayá e nesesidat pa monitoria indikadornan di kambionan den laman i dokumentá e eventonan di morto masivo di un manera sientífiko.

Impakto

Segun DCNA, e impakto di e evento aki riba e fauna lokal ta substansial, partikularmente pa e turtuganan bèrdè, ku ta komedónan oportunista i ta kla pa kome e piskanan morto. Sea Turtle Conservation Bonaire (STCB) a risibí diferente notifikashon di turtuganan  malu resientemente i te ku awor a rehabilitá ocho turtuga. Pero, den un tortuga ku a muri, STCB a hanja 37 dijnda, ku ta pone nan konklui ku esaki por a kontribuí na morto di e animal. 

Te ora e kousa di e morto masivo di e piskanan djinda ta resolvé, ta pidi tur hende keda vigilante i raportá opservashonnan inusual na STINAPA.