Na Kòrsou tambe: Kasonan di Covid ta subi basta rápidamente

Willemstad- Meskos ku ta e kaso na Boneiru, na Kòrsou tambe sifranan di infekshon ku Covid-19 ta sigui subi bastante rápido. Pa djarason tin 250 kaso nobo.

Esaki ta trese e total di kasonan aktivo na Kòrsou na un total di 1445 kaso. Perokupante ta tambe ku tin ya 39 persona ku ta hospitalisá pa motibu di Covid.

Aunke e kasonan total na Kòrsou ta subiendo, tòg relativamente ménos hende ta tèst positivo. Na Boneiru esaki ya pa algun tempu ta rondó di 44%. Na Kòrsou pa djarason, por ehempel, e ‘positive test ratio’ ta 23,5%. Ultimo dianan ta ripará ku e porsentahe ta subiendo si.

Morto

Tristu tambe ta e notisia ku den un solo dia, tin 3 morto adishonal di Covid na Kòrsou. Desde awe a implementá medida basta severo na Kòrsou pa trata na kontrolá e brote mas resien aki.