Kralendijk- Segun Arthur Sealy, den un opinion ku ela manda pa prensa riba djadumingu, ta niun ratu so e director di Liceo Boneriano mester a bin papia i splika maneho di e skol na Konseho Insular.

“Laga mi ta bon kla, Liseo no tin ningun kuenta i rason di duna  na  Konseho Insular. Promé ku kuminsá sapatia chèk funshon i tareanan di Konseho Insular. Ta diputado di enseñansa mester duna kuenta i rason. Asuntu di keda sinta òf bai un otro sekshon ta prioridat di e skol ku aprobashon di inspektor” asina Sealy a trese dilanti.

Sealy tambe ta sigui elaborá riba e ‘derechi’ di keda sinta den un klas. “Ningun alumno tin derechi di keda sinta. Imaginábo  un alumno tin un rapòrt ku solamente seis, su mayor bisa; mi yu ta keda sinta pasobra e tin derechi di keda sinta”.

Segun Sealy por tin motibu sí, manera pèrdè un temporada largu di enseñansa pa motibu di malesa, situashon familiar òf desaster natural, pa hasi e aña di nobo.Nada otro. Segun Sealy e promé kos ku mester hasi ta kontrolá si maestronan tantu di skol primario komo di skol sekundario ta duna lès bon.

Broma

Sealy ta di opinion ku e Komishon di Mayor no tin nada di bisa riba e parti aki a ni maske nan tabata dunadó di lès. “Mester abolí asuntu di keda sinta, dunamentu di tarea pa traha na kas i ku diploma di MAVO por bai HAVO 3. Keda sinta no tin ningun balor agregá na desaroyo di e alumno. Kuenta di duna e alumno un chèns, Elisa mi mama lo a bisa “Bou di barku tin chèns” E bèrdat ta ku ta e mayor, riba lomba di e alumno, ke broma ku su yu ta na HAVO/VWO” asina Sealy ta bisa.

Sealy ta pensa ku pa medio di e bringamentu tokante e regla nobo  i e direktor, mayornan ta kreando un generashon ku no por defendé su mes den komunidat i no ta flèksibel. “Mayornan tin komo tarea pa eduká nan yu a base di norma i balornan di e komunidat i maestronan mester sigui alsa nan nivel di duna lès bayendo kurso, lesa artíkulonan tokante dunamentu di lès i kambionan den nan materia i koperá ku otro. Inspektor mester ta konstantemente na skol”.

Keda leu

Na opinion di Sealy, Konseho Insular keda leu for di fundashonnan di enseñansa, meskos ku ta e kaso den Fundashon Kas Boneriano. “Mihó e nuebe miembronan atendé ku Hulanda pa pone un inspektor permanente na Bonaire kuminsá ku un Universidat na Bonaire”, asina Sealy a terminá.