KRALENDIJK- No a kaba di drecha algun parti di Kaya Gobernador Debrot, na altura di Hato, dentro di e lapso di tempu ku a primintí di antemano.

Segun un komunikado di prensa ku a saka wikent pasá, e kaminda mester a habri bèk pa tráfiko riba djabweps dia 3 di mart. Esaki sinembargo, no a sosodé.

Den dianan ku a pasa a raspa e asfalt riba pidanan di e kaminda, pa por asfaltá esaki di nobo. Mientrastantu ta pone tráfiko desviá via di un pidi kaminda di tera. Tin basta reklamo di habitante pa e echo ku outomobilistanan ta kore pasa duru i lanta yen di stòf.

Den loke ta parse un esfuerso pa laga outo baha nan velosidat riba e kaminda di tera a langa diferente drèmpel, tambe di tera, riba e parti di kaminda aki. Esaki no a yuda mashá.

Falta di informashon

Manera ta un bon kustumber na Boneiru no a tuma molèster di komuniká ku e trabounan lo no kaba den e lapso di tempu ku a komuniká anteriormente. Tampoko no a duna ningun splikashon tokante motibu di e retraso.

Ya ku tur tráfiko den direkshon di Sabadeko tin di pasa riba e parti di kaminda aki, ta basta outo tin ku pasa riba e kaminda temporal pa sigui nan kaminda.