‘No por kue sèn destiná pa kultura, usa pa drecha kaminda’

Kralendijk- Diputado di Kultura, Nina den Heyer den un konferensia di prensa djaweps mainta a bisa ku no por kue sèn destiná pa kultura, usa pa drecha kaminda, òf hasi kalke otro kos kun’e.

E diputado a hasi su komentarionan relatá na sierto krítika ku a usa 44.000 dòlar pa un grabashon nobo di e himno Boneriano, kaminda ku tin yen otro prioridat.

“Pero no ta asina asina, por kue sèn destiná spesífikamente pa kultura, anto usa esaki pa drechamentu di kaya òf kombatimentu di pobresa”, asina Den Heyer a bisa.

Importante

Tambe e diputado a para ketu na importansia di nos himno. “Tin hopi hende ta bisa ku nos tin ku defendé nos kultura i nos identidat. Nos himno ta parti di nos identidat, meskos ku nos idiomoa”, asina e diputado a splika.

Den Heyer a bisa si ku e tambe ta haña ku ta trata di hopi sèn. “Toch tin hende den e mundu di músika ta bisa ku e preis ta hopi bon pa e lokual ku nos a hasi kun’é i e lokual ku nos ta haña bèk”.

E grabashon nobo di e himno lo keda presentá Dia di Boneiru, ku ta selebrá di 6 di sèptèmber.