WILLEMSTAD – Kòrsou lo no risibí sosten di likides for di Hulanda pa e próksimo kuartal, asina sekretario di estado di Asuntunan di Reino, Alexandra van Huffelen ta skribi den un karta na Tweede Kamer.

Gobièrnu di Pisas tampoko no a pidi pa esei, meskos ku tabata e kaso den e promé i di dos kuartal. Komo ku tabatin un saldo positivo di likides komo konsekuensia ku a risibí dimas sosten di likides na aña 2021 i tambe entradanan di impuesto mas haltu ku a spera, Kòrsou a kuminsá aña ku un saldo di 253 mion ANG.

Ku esei por a kubri e défisit den 2022, ku tabata presupuestá riba 162 mion florin i konsekuentemente Kòrsou por pasa henter e aña aki sin sosten di likides di Hulanda.

Aruba i Sint Maarten

E otro islanan si mester di sosten di likides, pero Señora Van Huffelen ta wanta ainda ku un desishon te 26 di ougùstes, na momentu ku konseho di minister di Reino bini huntu atrobe.

Pa e di tres kuartal di 2022  Kolegio di supervishon finansiero a konsehá pa duna Aruba 4 mion florin i Sint Maarten 14 mion florin komo sosten di likides.

Banda di esei, djis promé ku Konseho di minister di Reino, e Kolegio a konsehá  riba  13 di yüli 2022 pa duna Aruba un instrukshon i lo diskutí esaki tambe dia 26 di ougùstes.