Ministerio Públiko ta bai hasi un investtigashon tokante un insidente na Saba kaminda un polis di Kuerpo Polisial Karibe Hulanda (KPCN) ku no tabata na servisio, a saka su arma di trabou. Esaki Ministerio Públiko a komuniká djarason atardi.

Ku e polis ku ta den e kaso, tabata tin tambe un trahadó di Marina Real presente, ku tabata involukrá den e insidente, i tambe lo a usa violensia. Ministerio Públiko (OM) ta bisa den nan deklarashon ku nan a tuma nota ku e insidente a kousa komoshon den komunidat na Saba, pero tambe riba Medionan Sosial, kaminda por a wak videonan di e insidente. 

Ministerio Públiko den su relato ta bisa ku lo bai hasi un investigashon kriminal bou di guía di un fiscal, pa determina kiko a kondusí na e insidente. 

“Manera di kustumber, tambe lo eksaminá e uso di violensia dor di e funshonarionan aki i ta tuma nan na e reglanan aplikabel pa esaki. E investigashonnan aki ta wòrdu hasí aktualmente pa Ofisina di Asuntunan Interno di KPCN i KMar. Tambe e konklushonnan di e investigashonnan aki lo wòrdu evaluá pa Ministerio Públiko”, segun e deklarashon di prensa. 

Investigashon di echo

OM ta suprayá k uta importante pa no saka konklushonnan promé ku tur echo relevante ta konosí. “Ora e investigashon ta kla i por saka konklushonnan, lo bin ku un komunikado tokante esaki”, asina bosero di Ministerio Públiko, Roderick Gouverneur, a promintí.