KRALENDIJK- Pa medio di un deklarashon na prensa, Ministerio Públiko (OM) djaweps atardi a konfirmá di ta hasiendo un investigashon na posibel aktonan kastigable, ora ta trata konstrukshon di e bich artifisial na Chogogo Resort. 

“Por a nota ku regularmente tin kobertura den medionan di komunikashon tokante di e investigashon aki. Resientemente tambe un artíkulo a paresé den medionan di komunikashon tokante di e kuestion aki, aparentemente ku motibu di un demanda presentá dor di OM na OLB”, asina OM ta skibi. 

Segun OM, den e konteksto aki, manera ta kustumber, ta kolektando tur e echo- i sirkunstansianan ku por duna klaridat ofer di e pregunta si posibelmente a kometé echonan kastigabel rondó di e konstrukshon di e bich aki. “Pa ku esaki ta relevante pa investigá si, por ehèmpel, a otorgá un pèrmit òf no i si a otorgá esaki, na ki momentu a otorgá esaki. Ta lógiko ku e demanda aki a keda dirigí na BC di OLB, mirando ku ta BC OLB ta e outoridat ku ta otorgá pèrmit i por lo tanto lo tin e informashon aki”, según bosero di OM. 

No por bisa nada ainda

Segun OM, mirando ku e investigashon ta kanando kétu bai, den interes di e investigashon ainda no por duna mas informashon tokante di kontenido di esaki. Na momentu ku finalisá e investigashon, OM lo evaluá e resultadonan. “Si nos konklushon ta ku probabelmente a kometé echonan kastigabel, nos lo evaluá si por determiná ken ta esun ku ta penalmente responsabel pa esaki i si ta bai ta nesesario pa persekushon (mas aleu). Na momentu ku tuma e desishonnan aki, lo duna mas informashon”, asina e komunikado ta konkluí.