Opinion: Cft a para bira manera un disko rayá na Boneiru

College Financieel Toezicht (Cft) poko poko a para bira manera un disko rayá na Boneiru. Aña tras aña i raportahe tras raportahe, e kolegio ta indikando e mesun kos.

“Boneiru no ta mustra sufisiente progreso, ora ta traha e maneho finansiero. E ofisina di akountènt pa loke ta trata kuenta anual di 2020, a bisa di no ta ekspresá opinion. Aktualmente ta trahando riba un aktualisashon di e plan pa mehorashon di e maneho finansiero. Dor di retraso den e mehorashonan, ta parse poko probabel ku pa aña 2021 sí lo logra haña aprobashon for di akountènt”, asina Cft a skibi den su último deklarason tokante e situashon nan Boneiru.

E desbentaha di un disko rayá ta, ku niun hende no ke skucha esaki mas. Asta sekretario di estado Raymond Knops no ta parse di ta masha impreshoná ku e konklushonnan di Cft. Durante su bishita na e isla, niun ora só e no a ekspresá prekupashon pa e falta di progreso riba e tereno aki -òf al ménos, no públikamente.

E medio di publikashon Bonaire.nu, ya na novèmber 2020 a mustra su mes krítiko pa ku e desishon di kontratá diferente konsehero eksterno pa e asina yamá ‘change team’, pa un montante di mas ku 400.000 dòler. E desishon a ku a wòrdu anunsiá, manera un kos masha grandi, dor di diputado di finansas di e tempu ei, Elvis Tjin Asjoe. Un di e konseheronan ta un èks trahadó di Cft mes; un detaye por sierto ku a purba skonde di tur manera.

Di nos gobièrnu lokal ya nos no ta spera masha mas, ora ta trata di responsabilisashon pa nan eskohonan i e gastamentu di fondonan di pueblo. Pero na momento ku ni gobièrno di Hulanda no ta aster palabranan di koutela di parti di Cft, esaki por wòrdu konsiderá komo bastante remarkabel.

Kon ku bo mirele, e plan di mehorashon a keda finansiá ku fondonan públiko. Ounke ku den e kaso aki ta Hulanda a pone sèn disponibel no ta kambia e echo aki. Si mester bai tras di loke Cft a pone den su raportahe i kartanan mas resien, ainda Boneiru ta basta leu for di kas, pa loke ta trata mehorashon di e maneho finansiero na Boneiru!