Awe mi no ta trata e frakaso, fiasko na Sint Maarten ni e kompensashon brutu di konsehalnan ni e papel di ku diesshete punto ni dak di piskadónan ni asuntu di transporte di enfermonan ni un botika ku a sera su porta ni BHM ku ya mester ta disolvé pero ta bai pone direktor di Selibon un kantu ni diputadonan ku ta mas ku un siman for di Bonaire i ku otro siman tur huntu ku konseheronan i Konseho Insular ta na Hulanda pa konferensia di trabou.

Ta na nos na Bonaire pa stòp di kere den storia, mentira i mitonan  di Kolegio Ehekutivo i Konseho Insular i mira e realidat.

Komo kordinadó di Grupo di Diálogo Bonaire ku ta trata kon sklabitut ta sigui traha den nos komunidat mi ke mustra ku storianan rondó di sklabitut ta pa desviá for di e realidat ku komersio transatlántiko di sklabitut a hasi mayoria di nos pa medio di famnan nobo despues di promé di yüli 1863 desendiente di prezunan afrikano. Ta un istoria di migrashon fòrsá i krímen kontra humanidat. Realidat ta ku despues di èksküs i pordon di parti di Hulanda tin 200 mion euro repartí den dos parti. 100 mion pa gruponan den komunidat sosial i 100 mion pa maneho riba e tereno di pasado di sklabitut.

A dividí e partinan den 33%  pa e seis islanan i Bonaire ta bini na remarke pa kada parti 555.555,50 euro. Unda e komishon, skohé pa e gruponan sosial, ku ta konsistí di persona imparsial, independiente no ligá na atministrashon di Bonaire, ni mará na e gruponan ku ta pidi supsidio ta?

Grupo di Diálogo Bonaire ta di opinion ku mester enbolbí desendientenan di katibu den e prosedimentu aki. Ta nan ta importante, ta na nan a pidi diskulpa i pordon. Pa konosé, rekonosé i konmemorá pasado di sklabitut Grupo di Diálogo Bonaire ta tene kombersashon di mesa, tene charla tokante trouma individual i kolektivo relashoná ku sklabitut. Riba 18 di mart di e aña aki ta bai tin un otro charla riba e tópiko aki na enkargo di un sikólogo.Ta bini invitashon pa tur hende asistí. 

Arthur Sealy