Boneiru

Opservadónan di Boneiru a yuda monitoriá elekshon general na Mexico

E opservadónan di Boneiru ku a biaha bai. Pòtret: BHRO

KRALENDIJK- Boneiru ta marka historia komo parti di Delegashon di 35 pais partisipando komo opservadónan Internashonal di COPPPAL durante e Elekshonan General di Mexico 2 di juni 2024. 

E evento históriko aki a koinsidí ku e elekshon di e promé presidente feminina, Claudia Sheinbaum. E delegashon di Boneiru tabata konsistí di James Finies di Pueblo Progresivo Un (PPU) i, Kaile Finies di Fundashon Movemento Pa Kambio i Davika Bissessar di Bonaire Human Rights Organization (BHRO). 

E representantenan Kalie Finies y Davika Bissessar a wordu spesífikamente asigná na e estado di Puebla i James Finies na e estado di VeraCruz.

Estando na Repúblika Dominikana i awor na Mexico su elekshonan presidensial komo Opservadórnan Internashonal ademas di kumpli ku su deber komo opservadór independiente, mi a haña tambe e oportunidat pa hasi konosí na nivel internashonal nos trayektoria, trabounan i esfuersonan pa pone Boneiru riba lista di Teritorionan-Sin-Propio-Gobernashon di Nashonan Uní”, asina James Finies a bisa. 

Finies ademas a enfatisá e nesesidat di proteha Demokrasia Real. “Komo nos tur ta nase igual den dignidat i derecho, den kontraste ku e situashon di Boneiru, ku ta marka pa desigualdat i representantenan elegí ku ta subordiná, I leinan ku ta wòrdu imponé pa Den Haag na lugá di pa e asina-yama gobiernu elegí di Boneiru, mientrastanto ku nos ta enfrentando un genosido demográfiko i kultural dor Reino Hulandes,  Demokrasia Real mester sigurá ku gobernashon di un sosiedat mester representá i sirbi e aspirashonan di e pueblo. E ta pa permití kada suidadano ekspresa su derecho I voz pa ku nan deseonan pa futuro”.

Hopi trabou

Kaile Finies di Fundashon Movementu pa Kambio a nota ku su eksperiensa durante e elekshon históriko di Mexico aki tabata asombroso. ”Ounke tabata un honor pa tabata einan pa presensiá e elekshon di e prome presidente muhé, tin hopi trabou ainda pa wòrdu hasí pa garantisá ku tur hende por vota di un manera hustu i sigur. Mi a papia ku vários suidadano ku a ekspresá nan preokupashon ku dor di e reinan largu nan no lo yega na bùrt na tempu pa por haña nan biyete pa vota”.

Derecho humano

Davika Bissessar presidenta di BHRO: “Mexico ku un poblashon di mas ku 200 mion ta di importansia pa highlight e importansia di derechonan humano durante elekshonan. Respetando derechonan humano ta fundamental pa sigurá ku elekshonan ta hustu, tin kredibildat i ta reflehá e boluntat di e pueblo. Nos delegashon a traha duru i hasi un bon trabou”. 

Deel dit artikel
Rocargo
Rocargo
Rocargo
Rocargo