KRALENDIJK-Orco Bank djaluna a duna inisio na e preparativonan pa Ride for the Roses Bonaire, fortalesiendo su kompromiso, pa duna sostén na konsientisashon di kanser i e bienestar di nos komunidat.

Komo ”supporter” fiel di Ride for the Roses Bonaire, Orco Bank ta bisa di sinti su mes honrá pa partisip’é na e Walk, Ride and SWIM for the Roses, evento ku ta plani’e pa 2 di febrüari, 2025 na Kralendijk. E evento anual aki ta sigi sirbi komo un plataforma poderoso pa promové salu, Iansa un apelashon importante pa konsientisashon di kanser, i fortalesé e sintimentu di solidaridat den nos komunidat Boneriano.

Durante e konferensia di prensa, Désirée Alberto-Martina, Managing Director di Orco Bank, a enfatisá’ e importansia di e inisiativa aki, ‘Ta un honor pa tei aki awe huntu ku Ride for the Roses Bonaire i tuma parti di un evento espektakular ku ta uni nos riba diferente islanan den un mishon kompartí pa lucha kontra kanser. E inisiativa aki ta reflehá e forsa kolektivo i e kompashon di nos komunidatnan na Boneiru, Kòrsou i mas leu.“

Judy Diaz, Country Manager pa Boneiru, a agregá su palabra di kurason “Ride for the Roses tin un Lugá speshal den nos kurason aki na Boneiru, For di su komienso na 2016, e evento aki a krese komo un símbolo di speransa, resiliensia i espíritu di komunidat. Kada partisipante, boluntario i sostenedó ta reflehá e kompromiso inkebrantabel ku nos Boneriano ta tin den e lucha kontra kanser. Huntu, nos ta invensibel.”

Dor di su kolaborashon ku Ride for the Roses Bonaire i Kanker Fonds Bonaire, Orco Bank ta reafirmá su dedikashon na inisiativa ku ta promové konsientisashon di salú i sosten pa komunidat. Na Boneiru i Kòrsou, Orco Bank a invertí den programanan ku tin un impakto grandi pa duna poder na sobrebibientenan i yuda famianan ku ta biba ku kanser.

Speransa

E próksimo evento di Walk, Ride and Swim for the Roses ta un faro di speransa i resiliensia. E ta suprayá e importansia di un esfilo di bida salú i ta krea un sintimentu di komunidat profundo entre e partisipantenan.