KRALENDIJK- Kontrali na tur otro isla di Antia Hulandes, Boneiru ta e úniko isla kaminda ku kasonan di Covid-19 ta sigui subi, i awor den forma mas akselerá atrobe ku un kantidat di 26 kaso nobo den un solo shòt.

Gobièrnu i mas en partikular departamentu di Salubridat Públiko ta sigui riba un trankilidat total, sin ku por nota un sentido di alarma, o al ménos un preokupashon kresiente.

Bonaire awor tin basta mas kaso ku Kòrsou ku a yega bou di 100 kaso e siman aki. Esaki, sin tene kuenta di e echo ku Kòrsou su poblashon ta kasi 10 biaha mas grandi ku Boneiru. Pregunta ta, na kuantu infekshon mester yega, promé ku Gobièrnu al ménos kuminsa pensa riba sierto medida pa frena e ola di kontagio.