WILLEMSTAD – Durante di un seremonia ofisial na e kantor prinsipal di TUI Dutch Caribbean establesé na Willemstad, Kòrsou, 18 stiwart i stiwardès nobo di TUI fly a risibí nan ‘Wing’. 

Esaki ta nifiká ku nan a konkluí nan estudio di cabin attendant na TUI ku éksito i nan ta kla pa por kuminsá funshoná komo parti di e personal di kabina na bordo di TUI. E grupo di kolega nobo lo traha spesífikamente riba e ruta entre Kòrsou i Amsterdam. Na e momentu aki tin 11 buelo pa siman for di i pa Kòrsou i for di novèmber esaki ta bira 14. 

Eskoho konsiente

Segun TUI ta bisa, ta un eskoho konsiente pa amplia su tim lokal di tripulante lokal. “Ku nan karisma, forma di duna servisio i konosementu di idioma nan ta perkurá pa trese un sintimentu kaluroso i konfortabel serka e pasaheronan na bordo”, asina TUI ta bisa.