KRALENDIJK- Riba djasabra 9 di òktober i djadumingu 10 di òktober Edward Berban lo duna un tayer tokante krio di kabritu profeshonal. E lo konta tokante maneho di kabritu, selekshon, kuminda i alohamentu. Sherwin Pourier lo papia tokante produkto regional i prueba di kalidat i tokante identifikashon i registrashon di kabritu.

Ta organisá e tayernan akí den kuadro di e proyekto Krio di Kabritu Profeshonal. E meta ta pa krea un situashon ‘win-win’ mediante kombinashon di ekonomia i ekologia: fortifikashon di krio di kabritu i tene e kabritunan parti paden di trankera di kunuku. E promé paso ta mehorashon di kalidat di karni di kabritu. Ku mihó maneho i mehorashon di rasa por produsí karni di lamchi ku por bende na un preis mas haltu.

Dia i ora

E tayer ta riba djasabra 9 di òktober na Servisio di Agrikultura, Krio di Bestia i Peska (LVV) di 13.30 te 16.30 or i riba djadumingu 10 di òktober na Mangazina di Rei di 13.30 te 16.30 or.

Kunukeronan ku ke partisipá na un tayer, por registrá na LVV via number di telefòn 717 8836 òf via email [email protected]. Tin lugá pa maksimalmente 20 persona pa kada tayer.