Notisia

Outoridatnan ta mira desaroyonan positivo enkuanto lèkashi di zeta na Boneiru

KRALENDIJK – Nolly Oleana, ku nan a apuntá komo gezaghebber interino di Boneiru na 2023, a anunsiá den un konferensia di prensa nobo ku e esfuersonan pa e akshon di limpiesa den besindario di Lac i Sorobon ta kanando bon. Nan lo limpia promé e áreanan, ku ta di vital importansia  pa piskadó-, empresa- i turistanan. Oleana ta pone énfasis riba e importansia pa reanudá e aktividatnan empresarial rápido den e área i a gradisí e empresa- i personanan konserní pa nan ayudo na momento di deshasí di e zeta.

Oleana a anunsiá ku a hasi un petishon pa haña asistensia militar na Boneiru pa intensivá e operashon di limpiesa. “Lo enbolbí unidatnan militar pa yuda ku deshasí di e polushon di zeta”, segun e gezaghebber interino. Oleana a ekspresá su preukupashon tokante e posibilidat di mas polushon den diferente bokanan di laman riba e isla i a enfatisá e importansia di akshon rápido pa evitá mas daño na naturalesa.

Huntu ku Trinidad i Tobago

Den e konferensia di prensa kapitan di haf Gunther Flanegin a bisa ku imáhennan di satélite no ta mustra lèkashi di zeta nobo entre Trinidad i Boneiru. Sinembargo  Flanegin a deklará si ku manchanan grandi di zeta ta drif den direkshon di Kòrsou i Aruba. El a remarká ku e kosta suit di Boneiru a skapa relativamente, pero a atvertí pa posibel restunan di zeta nobo na Onima. Flanegin a bisa ku ta evaluá e situashon konstantemente i ku ta tuma mas medida  den konsulta ku outoridatnan.

Pa eksigí eventualmente kompensashon pa daño i perhuisio Flanegin ta bisa lo siguiente: “Nos tin kontakto ku Trinidad i Tobago. Huntu nos ke kontinuá si. Un eksperto hurídiko di Hulanda tin kontakto ku un hurista di Trinidad i Tobago. Nan ta trata e kaso. Nos niun di dos no sa si ainda ken ta doño di e barku. I nos no sa tampoko ken ta doño di e produkto petrolero den e barku. Na momento ku esaki ta konosí nos lo por tuma e siguiente pasonan”.

Sosten di ehérsito 

Judith Raming, gerente di Bonaire National Marine Park a gradisí tur esnan enbolbí pa nan ayudo ku nan esfuersonan pa deshasí di e zeta. El a bisa ku e enfoke di dia tabata riba limpia Sorobon, kaminda diferente instansia manera LVV, WEB i brantweer a yuda. Raming a anunsiá ku mañan, ku asistensia di ehérsito, lo sigui ku mas aktividat di limpiesa. El a insistí ku énfasis  ku na e momento aki no mester di asistensia èkstra di boluntario.

Deel dit artikel
Rocargo
Rocargo
Rocargo
Rocargo