Kralendijk – Kolegio Ehekutivo a disidí pa otorgá un krédito pa finansiá gastunan diario na kurátòr di e kompania BOPEC ku siman pasá korte a deklará fayit. E desishon aki ta hasi posibel pa den e temporada binidero sòru pa siguridat riba tereno di e kompania i monitoriá e instalashonnan.

Laga e tereno sin vigilansia no ta un opshon pa Kolegio Ehekutivo, pasobra esaki lo trese riesgonan di siguridat iresponsabel kuné. Pa e motibu aki a disidí pa reakshoná positivamente riba súplika di e kurátòr pa pone un suma di en total $ 250.000 disponibel den forma di un krédito pa gastunan diario, konosí tambe komo ‘boedelkrediet’.

Siman pasá miembro di Konseho Insular Daisy Coffie, a advertí gobièrno pa ta hopi kouteloso ora ta traha di fia sen na un entidat privá, ku pa kolmo ta den un estado di bankarota.

Paga bèk

‘Siguridat ta bini na promé lugá’, segun gezaghèber Edison Rijna, kende ta enfatisá ku ta trata di un krédito ku nan tin ku paga bèk atrobe tambe. A base di lei di bankarota Entidat Públiko Boneiru tin un státùs preferente i pues lo tin preferensia na momentu di repartishon di benta, den kaso di likidashon di e propiedatnan na su debido tempu.

Kurátòr mr Van Liere a konfirmá por eskrito na Kolegio Ehekutivo ku por spera pago bèk kompleto. Den e tankinan di BOPEC tin un stòk grandi di zeta krudo na balor di miones di dòler. Ora ku bende esei e kurátòr por depositá e krédito pa gastunan diario bèk.

‘Finansa i regulashon di Entidat Públiko Boneiru ta pèrmití nos pa hasi esaki. Hopi mas grandi ta mi preokupashon tokante e empleadonan ku tabata den servisio di BOPEC òf ku tabata traha via supkontratista. Seramentu di e kompania ta un sla duru pa e hendenan aki i nan famia. Komo Kolegio Ehekutivo nos lo duna nos koperashon kompleto na inisiativanan pa realisá empleo remplasante’, segun gezaghèber Rijna.

Esfuerso

Resientemente tambe Konseho Insular, den un dekreto di Konseho Insular di 4 di mart último, a instruí Kolegio Ehekutivo pa den koperashon ku gobièrnu di Reino, hasi esfuerso pa mantené BOPEC operashonal riba un base ekonómiko empresarial salú, teniendo kuenta ku siguridat di personal i medio ambiente konforme standartenan internashonal. Den e kuadro aki tambe mester mira otorgamentu di e krédito pa gastunan diario.