Kralendijk- Gobièrnu di Boneiru ta bai implementá un regla nobo ora di duna proyekto, esta ku por lo ménos mester reklutá 50% di empleado pa e proyekto via di Plenchi di trabou.

Suidadanonan ku a pèrdè nan trabou pa motibu di e krísis di corona i ku ta inskribí na ‘jobcenter’ Plenchi di Trabou komo persona ku ta buska trabou, ta haña preferensia riba trabou den kaso di proyektonan i aktividatnan ku ta keda ehekutá riba enkargo di gobièrnu di Boneiru. Esaki ta loke Kolegio Ehekutivo a disidí.

Pa aña 2021 Entidat Públiko Boneiru a plania invershonnan konsiderabel den infrastruktura. Esaki ta ofresé oportunidat pa habitantenan ku ta buska trabou. Pa e motibu aki na momentu ku despues di destaho duna enkargo di un proyekto pa kua mester di trahadó, entrante awor ta pone e kondishon ku empresanan tin ku selektá por lo ménos 50% di e trahadónan ku nan tin mester via Plenchi di Trabou. Den kaso ku no tin sufisiente kandidato adekuá, e kompania por pidi dispensashon di e regla aki.

Sin trabou

Segun kalkulashon mas òf ménos 400 suidadano a pèrdè nan trabou komo konsekuensia di e krísis. Tanten ku turismo no lanta kabes bèk i un rekuperashon fuerte di ekonomia no presentá ainda, tin tiki perspektiva riba trabou nobo. Pa e motibu aki solushonnan konkreto riba término kòrtiku ta nesesario.

Kolegio Ehekutivo no ta apliká e regla di 50% solamente riba enkargonan ku nan ta duna, pero tambe riba nan propio organisashon. Den kaso di tur proyekto i aktividat dentro di Entidat Públiko Boneiru pa kua mester buska trahadó nobo, personanan ku ta buska trabou i ku ta inskribí na Plenchi di Trabou ta haña preferensia. Ku esaki gobièrnu ta kumpli ku su responsabilidat pa fasilitá oportunidat, i suidadanonan ku e krísis di corona a afektá mas severamente ta haña un chèns mas grandi riba un trabou i un entrada.

Job center

A lanta Plenchi di Trabou, un koperashon entre unidat di Asuntunan Sosial i Empleo di RCN i Entidat Públiko Boneiru, ku e meta pa trese demanda i oferta riba merkado laboral serka otro. Ta importante ku tantu personanan ku ta buska trabou komo dunadónan di trabou ku tin vakatura ta mèldu nan mes na e ‘jobcenter’. Por inskribí na Plenchi di Trabou via info@plenchiditrabou.com òf (+599) 715 8346.