Pakete di kuminda i un buki di klùr pa 700 mucha

Kralendijk – Stichting  ‘Voeding op school Bonaire’ huntu ku Entidat Públiko Boneiru (EPB) pa di dos biaha a parti pakete di kuminda pa 700 mucha.

Klup di servisio Kiwanis a sòru pa den e pakete di kuminda tin un buki di klùr pa e muchanan. Djabièrnè último a entregá e paketenan di kuminda durante un ‘drive-thru’ na SGB.

E paketenan ta pa muchanan ku normalmente ta desayuná na skol, pasobra kos ta difísil pa nan na kas. Pa motibu di e lockdown e muchanan akí tabata menasá di no haña nan desayuno, pasobra skol ta será. Djabièrnè binidero ta parti e paketenan di kuminda pa delaster biaha.

Ora ku skol habri dia 12 di aprel, e muchanan ku tin mester di esaki, manera ta kustumber ta haña nan desayuno na skol. Portrèt: EPB