KRALENDIJK – E kantidat di pasahero na Aeropuerto Flamingo Airport ta mustra un pantaya miksto na 2023. Esaki por a konkluí for di informashon duná pa direktor di aeropuerto Maarten van der Scheer den un presentashon durante e konferensia di prensa di Tourism Corporation Bonaire (TCB) tení riba djarason.

Kaminda ku e kantidat di pasahero, spesífikamente esnan di e region, ta subi konsiderablemente, por mira ku e kantidat di pasahero for di Europa ta kedando atras kompará ku e aña anterior. Merkado Merikano te mustra estabilidat, ounke tin speransa konkreto ku esaki lo bai desaroyá positivamente dentro di poko. 

“Flamingo Airport a eksperensiá un kresementu modesto na 2023, ku algun kambio grandi entre segmentonan. Despues di un kresementu grandi na aña 2022, e merkado Hulandes a konsolidá su kapasidat na 2023, ” asina Van der Scheer a bisa. TUI a redusí e kantidat di buelo, mientras ku KLM a kambia e Boeing 777 pa e Airbus A330, ku ta bastante mas chikí. Esaki ta nifiká ku pa kada buelo tin un 100 stul ménos, lagando na banda e echo ku Boneiru tin ku kompartí e buelonan aki ku Aruba, ya ku e buelonan aki ta wòrdu ehekutá den un asina yamá triángulo. 

Na otro banda eeropuerto ta positivo tokante e ekspanshon di e kantidat di buelo di United i e inisio di buelonan di e kompania kanades Westjet, ku lo kuminsá dia 12 di desèmber.

Islanan

Trafiko aéreo entre e islanan a eksperensia un kresementu grandi debí na buelo èkstra di kompanianan manera Divi Divi i EZAir, i e kuminsamentu di buelo di Winair pa Kòrsou i Sint Maarten. Apesar di ku tambe tabata sperá buelonan nobo di JetAir, esaki no a materialisá ainda.  

Na tur, ta sperá ku Flamingo Airport lo kaba e aña ku entre 435.000 i 440.000 pasahero, un kresementu leu kompará ku aña anterior.

Infrastruktura

Segun Van der Scheer, Flamingo Airport ta kontinuá traha na mehorá su infrastruktura. “Entretanto  nos ta sigui aktualisá nos fasilidatnan, manera e sistema pa entregá maleta den sala di yegada i konstrukshon di un dak na yegada, pa pasaheronan kana bou di dje. Otro desaroyonan relevante tabata entrada di e asina yamá ambulift pa personanan den ròlstul, i un instalashon di un sistema di tratamentu di awa sushi for di avionnan.