PHILIPSBURG – E bishita na Sint Maarten ta tras di lomba pa rei Willem-Alexander, reina Máxima i prinsesa Amalia. Despues di dos dia e delegashon ta sali awe pa Sint Eustatius pa djaweps nan bai Saba.

A finalisá e bishita na Sint Maarten djamars ku un resepshon serka gobernador. Den nan residensia ofisial gobernador Ajamu Baly i su esposa a yama Amalia i e pareha Real bonbiní. Alrededor di 75 persona tabata presente, entre otro personanan ku tabatin un ròl importante durante e krísis di corona i despues di orkan Irma na 2017.

Mèrdia e delegashon tabatin kòmbersashon ku diferente organisashon no-gubernamental i a planta e sali hel ku ta un mata ku balor históriko pa e isla.

Sint Eustatius

Na Sint Eustatius komisario di gobièrnu Alida Francis lo risibí e delegashon Real kaminda nan lo papia ku outoridatnan. Durante un kaminata den e nukleo históriko di Oranjestad nan lo topa diferente Statiano ku lo konta di nan bida riba e isla.

Tambe lo para ketu na e pasado di sklabitut durante e kaminata aki. Seguidamente e Pareha Real i e Prinsesa di Oranje ta djòin un debate ku hóbennan kaminda nan lo papia riba e futuro di e hóbennan riba e isla.

Despues di un lùnch ku diferente habitante di Sint Eustatius e Rei, Reina Máxima i e Prinsesa di Oranje ta bishitá Oranje Zeelandia Beach kaminda nan ta haña splikashon di e maneho di naturalesa riba e isla i di e ‘Beach Clean Up’ anual di Statia-doet.

Despues e delegashon ta bishitá un hardin komunitario kaminda nan lo hiba kòmbersashon ku agrikultornan riba suministro di kuminda na Sint Eustatius. Pa motibu ku tin ku importá hopi produkto djafó e preisnan ta haltu i tin eskases di produkto fresku riba e isla.

Na kontinuashon e delegashon ta partisipá na un entrenamentu di basketbòl ku studiantenan. Ta finalisá e bishita na Sint Eustatius ku un manifestashon den Fort Oranje ku ta representá e patrimonio kultural di Sint Eustatius.