Kralendijk – Selebrashon di dia di Boneiru e aña aki ta tuma lugá dilanti Bestuurskantor pero di un forma adaptá ku algun invitado teniendo kuenta ku e reglanan di covid. Manera tur aña pa e okashon aki gobièrnu di Boneiru a instituí un komishon pa organisá e festividat aki, ku ta nos dia nashonal.

E tema di e aña aki ta “Unidat ta e yabi pa libertat”

E dia ta kuminsá ku un reunion sòlèm di konseho insular na Passangrahan pa 08.30. E parti protokolar lo sigui pa 09.35 ku e gruponan uniformá ku lo marcha i bou di e tononan di nos himno nashonal ku ta interpretá dor di un kor lo hisa e bandera gigantesko di Boneiru.

Despues di e parti di hisamentu di bandera lo sigui ku e parti eukuméniko siguí pa algun kansion di gospel dor di kor San Luis Beltran,  diskursonan, rekonosementu na nos suidadanonan di honor i ta sera e selebrashon ku un bunita shou.

Sperando ku kada suidadano ku ta stima e pida baranka aki, krea un sentimentu di patriotismo i demostrá esaki tambe. Esaki por sosodé pa medio di un bandera sea na kas òf na outo, un steker, pen, vestuario òf di kualke manera ku bo por ekspresá ku bo ta un boneriano i ku amor inmenso pa bo isla.

Pueblo Boneriano por sigui e e reunion sòlèm i e parti protokolar mainta atrabes di nos medionan di komunikashon.

Entidat Públiko Boneiru ta deseá henter pueblo di Boneiru un felis i dushi Dia di Boneiru.

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano