THE BOTTOM –  Despues di kuater aña Windward Islands People’s Movement WIPM di Bruce Zagers  mester tolerá atrobe oposishon den konseho insular di Saba. Su partido ta keda esun mas grandi si ku tres asiento. E partido nobo Progress, Equality and Prosperity PEP di Saskia Matthew a optené e otro dos asientonan durante elekshonnan di ayera.

Na tur tabatin 1.040 voto bálido pa Konseho insular, di kua 617 a bai pa WIPM i 324 pa PEP. Pa haña un asiento, e partidonan mester a haña 208 voto. E lista blanco di Dave Levenstone, lista 4, a haña 95 voto i e partido nobo Saba Caring People Party di Enrico “Cuchie” Klaber a haña 4 voto.

Nòmbernan

Algu despues di 11’or di anochi Gezaghèber Jonathan Johnson a anunsiá e resultado preliminar i e nòmbernan di e sinku miembronan preliminar di Konseho insular: Hemmie van Xanten (PEP) ku 26 voto, Saskia Matthew (PEP) ku 137 voto, Eviton Heyliger (WIPM) ku 122 voto, Rolando Wilson (WIPM) ku 84 voto i Bruce Zagers (WIPM) ku 191 voto.

Saba tin 1.259 persona ku por a vota pa elekshon di Konseho insular i 917 pa elekshon di un Kolegio elektoral pa Eerste Kamer

En general Saba tin un partisipashon hopi haltu na elekshonnan. Na e elekshon pa Konseho insular di 2019 mas ku 92 porshento di e 1.078 personanan ku por a vota a bai urna. E aña aki e partisipashon a baha ku kasi djes porshento i bira 82.6 porshento.