Pasahero ku a biaha bai Kòrsou ku tèst falsifiká ta empleado di RCN

Kralendijk- E pasahero femenino ku resientmente a biaha di Boneiru bai Kòrsou ku un resultado di PRC falsifiká ta resultá di ta un empleado di RCN ku inishalnan F.A.

E señora konserní a tèst positivo promé ku su biahe, pero ela biaha tòg. Ora hende konosí a mira e señora konserní na Kòrsou nan a bati alarma. Un kòntròl adishonal ku a hasi a mustra ku e señora a falsifiká e resultado pa pone esaki mustra negativo.

For di ayera nochi aworbonaire.nu a tuma kontakto ku vosero di RCN pa konfirmá e echo ku ta traha aki di un empelado di RCN. E informashon a wòrdu konfirmá awe mainta. Sinembargo RCN ta bisa ku no lo divulgá mas informashon, ya ku nunka no ta kompartí informashon di empleado individual.

Investigashon

RCN a enfatisá sinembargo ku integritat di su empleadonan ta masha importante pa e organisashon, i ku nan ta sigui investigá un k’e otro.

Tambe mester remarká ku autoridatnan nan Kòrsou ainda lo por entregá un keho ofisial kontra di e persona konserní. E señora mientrastantu a keda poné den isolashon obligatorio.