Kralendijk- Partido Demokrátiko Boneriano (PDB) a manda notifiká Konseho Insular ku den kuadro di ‘vragenuur’ e partido lo ke hasi vários pregunta na Kolegio Ehekutivo.

E promé pregunta lo ta na diputado Nina den Heyer, pa loke ta trata subida di prèis pa loke ta bibiendanan sosial.

Di diputado Hennyson Thielman, PDB lo ke sa kon ta pará ku e asina yamá Masterplan2030. Kolegio ehekutivo a kontratá un konsehero pa skibi un rapòrt final tokante e trayekto di Masterplan2030, pero no a tende nada mas tokante esaki.

Di diputado Kroon i Thielman, PDB lo ke sa kon a para ku plannan pa ku e tereno di anterior Hotel Bonaire. Resientemente tabata tin vários pregunta den komunidat tokante e plannan aki.

Merikano

Finalmente PDB ke hasi pregunta na ámbos gezaghèber Edison Rijna i diputado di turismo, Hennyson Thielman, tokante komentarionan ku e promé mandatario a hasi pa loke ta trata preis di tèstnan di Covid na Boneiru. Reakshonando riba preguntanan di Mega FM i Ron Gijzen, Rijna a laga sa ku si turista merikano ta opiná ku Boneiru ta karu ku su tèstnan ta karu, ku ta mihó pa esakinan bai pasa fakansi na Kòrsou i laga Boneiru un banda.

PDB ke sa awor si e komentarionan di Rijna ta reflehá e maneho di BC pa loke ta trata turismo merikano.