Pèrmit di konstrukshon pa kompleho di apartamentu nobo na Blue Bay Curaçao

WILLEMSTAD – Hague Blue Investments a haña un pèrmit di konstrukshon pa konstruí apartamentu na Blue Bay Curacao Golf & Beach Resort.

Den Plan di maneho Insular a destiná e área rondó di Blue Bay komo área turístiko.

En total lo konstruí djesocho apartamentu i seis penthouse partí den seis kompleho. Segun minister Charles Cooper, ku a duna ayera e pèrmit di konstrukshon ofisial, e kompleho di apartamentu lo hisa e kalidat di bida den e área i lo atraé mas turista.

“Un ehèmpel di arkitektura aktual i duradero”, segun e minister, ku ta indiká ku kontratista-, ingeniero- i arkitektonan lokal lo ta partisipá den konstrukshon.

“Esaki ta un estímulo pa ekonomia, pasobra e ta ofresé Kòrsou oportunidat pa trabou. No solamente na ora di konstrukshon, pero tambe na ora di mantené e kompleho”.