DEN HAAG – Ministerio Hulandes di Salubridat, Bienestar i Deporte a kuminsá perfekshoná e derechonan i posishon di personanan ku un limitashon riba e islanan Boneiru, Sint-Eustatius i Saba. E inisiativa aki ta un preparashon riba e ratifikashon di Handicap, e tratado di Nashonnan Uni, riba e islanan aki. Ounke Hulanda a introdusí e tratado di Nashonnan Uní kaba na 2016, e no ta na vigor ainda riba e islanan BES.

Un eksplorashon resien, ku e organisashon Boneriano TaraBV a hasi, tin komo meta di forma un bista kla di e situashon aktual di personanan ku un limitashon riba e islanan.  E eksplorashon aki ta konsistí di investigashon literario i kòmbersashon ku diferente partinan embolbí, tantu riba e islanan komo na Hulanda Europeo. A base di e eksplorashon aki a traha un dokumental ku ta duna un bista den e eksperensia- i retonan di personanan ku un desabilidat den Karibe Hulandes.

A presentá e resultadonan di e eksplorashon durante un kongreso tokante e tratado di Nashonnan Uní Handicap ku a tuma lugá riba 3 di novèmber na Kralendijk, Boneiru. Organisashonnan importante manera entre otro Ieder(in) tabata presente i a hiba kòmbersashon ku organisashonnan(di interes) i ekspertonan. E interakshonnan aki ta krusial pa fortifiká e defensa di personanan ku un limitashon den Karibe Hulandes.

Un di e konklushonnan mas importante di e eksplorashon ta e nesesidat pa tin mas realisashon i emansipashon rondó di personanan desabilitá. Ta boga pa un kambio di e modelo médiko pa un modelo sosial di desabilidat, kaminda e enfoke ta riba e interakshon entre e desabilidat di e individuo i e inaksesibilidat di e komunidat.

E vishon aki a kondusí na sinku rekomendashon, manera entre otro integrashon di e kestion aki den e manera di ataká pobresa lokal i refuerso di profeshonalisashon.