KRALENDIJK – Te ku 5 di desèmber 43 mayor i kuidadó di mucha ku tin mester di kuido intensivo na Boneiru, a hasi petishon pa un kompensashon di 1437 dòler. Di e kantidat aki ya a paga 31. E periodo di petishon pa e kompensashon ta sigui te ku 30 di desèmber 2022. E Unidat SZW di RCN i Sentro Akseso ta animá mayor i kuidadó di mucha ku tin mester di kuido intensivo pa hasi uso di e areglo temporal aki.     

E kompensashon ta pa kompensá e kompensashon pa yu dòbel struktural ku lo introdusí asina ku finalisá e trayekto legislativo. E areglo temporal ta konta pa mucha ku tin mester di guia intensivo, komo konsekuensia di un malesa òf enfermedat. Por ehèmpel riba tereno di higiena di kurpa, limpiesa di kurpa, kome i bebe, mobilidat, komportashon i kuido médiko. Mayor i kuidadó ku tin kustodia riba mucha ku di promé di novèmber te ku 30 di desèmber 2022 tin òf ta kumpli 3 aña di edat (t/k 17 aña) i ku tin derechi riba kompensashon pa yu na Hulanda Karibense, por entregá un petishon te ku 30 di desèmber 2022. 

E evaluashon médiko si un mucha tin mester di kuido intensivo ta sosedé na Boneiru via Sentro Akseso. Ta klasifiká ku e nesesidat di kuido ta intensivo, ora mucha tin mester di kuido intensivo diario riba diferente tereno. Den kaso di un evaluashon médiko positivo, unidat SZW di RCN lo por paga e kompensashon di 1437 dòler. Esaki ta un montante bruto. 

Na Boneiru mayor i kuidadó di mucha por entregá e formulario di petishon i e lista di pregunta médiko na Sentro Akseso situá na Kaya Prinses Marie 7, riba dia di trabou entre 8’or di mainta i 4.30 ‘or di atardi òf via meil aanvraagkindzorg@aksesobon.com. Mayor/kuidadó di mucha por akudí na Sentro Akseso pa e formulario i pa ayudo pa yena nan, pa pregunta tokante e evaluashon médiko i eventual guia kuido di e mucha. 

Tambe por haña tur informashon, e formulario di petishon i e lista di pregunta médiko onlain via www.rijksdienstcn.com.