Pidi pèrmit pa negoshi awor mas lihé

Kralendijk –  Ta bira mas fásil pa habri un negoshi na Boneiru. Pronto lo por haña un pèrmit di establesimentu den 6 dia di trabou.

For di promé di yüli ta bira posibel pa hasi e petishon online. Ora hasi un petishon online e proseso ta dura ménos largu. Entidat Públiko Boneiru (EPB) huntu ku Kamara di Komersio ke kòrta e tempu pa trata un pèrmit, pa asin’ei yuda esnan ku kier kuminsá un negoshi.

Aworakí un persona mester warda 8 siman pa haña su pèrmit. Esaki por afektá kon lihé i fásil un hende por kuminsá ku su negoshi na Boneiru. Hasiendo e periodo akí mas kòrtiku ta algu ku sektor privá a boga p’e pa hopi aña.

Kita opstákulo

Diputado di desaroyo ekonómiko, Hennyson Thielman, a indiká ku gobièrnu di Boneiru a pone e vishon pa kita “opstákulo” for di prosesonan pa petishonnan por kana mas rápido i asina fasilitá nos komunidat ku un servisio moderno, simpel i rápido. Esaki tambe ta importante pa stimulá negoshi na Boneiru i pa fasilitá esun ku kier kuminsá un negoshi.