WILLEMSTAD – Tres kachó Pitbull a ataká ayera un señora di 56 aña. E insidente a tuma lugá den Kaya Pronoia na Jongbloed den oranan di mainta mientras e víktima tabata kanando ta bai su trabou.

E kachónan a atak’é, bash’é abou i a mord’é rònt su kurpa. E tabatin heridanan serio na su mannan, pianan, kurpa i kara. Ora ku ambulans a yega, e señora tabata grita di doló.

For di investigashon di polis a bin sali na kla ku e víktima tabata kana den e kaya menshoná ta bai su trabou na momento ku e kachónan a sali diripiente for di un ket ku no tabata será i a atak’é.

A transportá e señora ku urgensia ku ambulans pa sala di emergensia  di CMC pa tratamentu médiko. Entretantu a operá e señora.

E doño di e kachónan tambe a haña mordé. Mientrastantu a mata e tres pitbullnan.

No tin norma 

E matutino Èxtra a papia ku Stanley Ignaio. E empleado di detekshon spesial ku ta enkargá ku asuntunan di animal no a mira antes un persona ku a risibí mordénan serio asina na man di kachó.

Ignacio ta rekonosé ku ta difísil pa evitá e tipo di insidentenan aki. Hopi biaha ora ku entregá keho polis no por aktua pa motibu di falta di normanan ofisial di Ministerio Públiko riba e lei nobo pa protekshon di animal.

 “Nos leinan ta bisa ku mester sterilisá kachónan peligroso manera den e kaso aki pitbull, ora ta kachó muhé i kapa ora ta trata di kachó machu. Tambe e kachónan aki mester haña un microchip pa por registrá nan.”

Segun Ignacio tabatin un periodo di transishon pa e doñonan di e kachónan aki por a tuma akshon i despues lo a kita kada kachó for di nan si e doñonan no a kumpli ku lei.

“Den e promé kuater lunanan a tuma akshon i despues a tapa e lei warda. I awor nos ta mira tur kaminda den notisia, riba Facebook i den avisonan ku ta bende kachónan pitbull, mientras ta prohibí pa reprodusí e kachónan aki. E meta di e lei tabata ku despues di un aña no tin pitbull mas na Kòrsou”, segun Ignacio.