KRALENDIJK—Ponedónan di fever na Boneiru por ta hopi kontentu, ku denter di algun luna, nan tin un lugá apropiá pa hasi loke nan gusta, sin mester tene kuenta ku polis. Diputado Kroon a papia ku 2 miembro di prensa djabièrnè mèrdia, tokante e trabounan ku ya ta avansando na e tereno na altura di Onima.

“Debí na yobidanan fuerte ku tabatin, esaki a tuma poko retraso den e proseso pa kuminsá ku e trabounan pa yega na promé lugá, un lugá spesífiko pa ponementu di fever i despues ta sigui atendé pa yega na e parti di pista pa pustamentu”, asina Kroon a splika. 

Kroon a bisa tambe ku gobièrnu a pone 200 mil dòler pa inisiá e proyekto. Banda di esei a pone 800 mil pa e parti di pista tambe. “Mi ke gradisí bestür kolege i Eilandsraad, pasobra si nan no a aprobá, esei lo no tabata posibel pa kuminsá ku e trabounan”. 

Pasensi

Segun e diputado, awor ta atendé ku skohe e kompania pa sigui ku trabounan. Ta premirá ku aki un luna ku ta kla pa konstruí e plenchi.  “Esaki ta garantisá pa e hóbennan tin un lugá pa nan praktiká e deporte. Danki pa tur ku ta den e mundu di dragrace i ponementu di fever, pa nan pasenshi”, asina Kroon a bisa.